Lartmadhëria e Tij Princi Michael i Kentit, së bashku me një delegacion të biznesmenëve dhe investitorëve të njohur nga Britania e Madhe gjatë ditës së sotme pritet të arrijnë në Kosovë.

Princi dhe delegacioni i biznesmenëve do të qëndrojnë në Republikën e Kosovës prej sot e deri më 5 qershor. Kjo vizitë është organizuar nga Oda Ekonomike Britanike në Kosovë dhe ndihmuar e përkrahur nga Qeveria e Kosovës.

Kosovapress njofton se gjatë qëndrimit në Kosovë, Princi Michael dhe delegacioni i tij do të priten nga krerët më të lartë shtetërorë të Kosovës, ministrat e kabinetit qeveritar si dhe afaristë dhe partnerë të tjerë nga Kosova.

Delegacioni afarist që shoqëron Princin Michael do të interesohet për mundësi investimi në Kosovë në fusha të ndryshme si në telekomunikacion, miniera, energjetikë, turizëm dhe fusha të tjera si dhe do të bëjë vizita në disa zona ekonomike dhe industriale të Kosovës.

Kryeministri i Kosovës, Hashim Thaçi i ka dëshiruar personalisht mirëseardhje në Kosovë princit Michael dhe delegacionit të tij gjatë zhvillimit të një bisede telefonike me të.
 

< Paraprake		Pasuese >