“Bashkimi Evropian sërish dhe pa asnjë dilemë është i përkushtuar për perspektivën evropiane të vendeve të Ballkanit Perëndimor, që mbetet kusht kyç për stabilitetin dhe zhvillimin e këtij rajonit”, kjo është deklarata e përbashkët e dalë nga takimi ndërministror Bashkimi Evropian-Ballkani Perëndimor.

Në deklaratë përshëndetet synimi i BE-së për të zgjeruar procesin e liberalizimit të vizave për të gjithë qytetarët e Ballkanit Perëndimor, kur të jenë përmbushur të gjitha kushtet.

“Vendet e Ballkanit Perëndimor duhet t’i intensifikojnë përpjekjet e tyre për përmbushjen e kritereve dhe kushteve në rrugën drejt anëtarësimit në BE. Përparimi i çdo vendi do të varet nga meritat e secilit prej tyre”, thuhet në deklaratën e miratuar të samitit.

Bashkimi Evropian ka verifikuar nevojën e kushteve të drejta dhe rigoroze në kuadër të procesit të stabilizimit dhe asociimit dhe në harmoni me konsensusin e ripërtërirë për zgjerimin, që ishte miratuar në dhjetor të vitit 2006.

Në samitin e sarajevës është përshëndetur vendimi i Komisionit Evropian për regjimin pa viza për qytetarët e Shqipërisë dhe Bosnjës. Në këtë takim kanë marrë pjesë 48 delegacione – ministra të punëve të jashtme dhe zyrtarë të lartë të BE-së, të vendeve të Ballkanit Perëndimor, SHBA-ve, Rusisë, Turqisë dhe organizatave ndërkombëtare.

Të pranishëm ishin edhe zyrtarja e lartë e BE-së, Cetherine Ashton, Stefan Fule dhe ministrat e jashtëm të Italisë, Franco Frattini, dhe të Spanjës, Miguel Anhel Moratinos.

Samiti i Sarajevës, i organizuar nga Presidenca Spanjolle me përkrahjen e BE-së, shënon përvjetorin e 10-të të Samitit të Zagrebit më 25 nëntor 2000, ku BE-ja filloi Procesin e Stabilizim-Asociimit dhe perspektivën evropiane për Ballkanin Perëndimor.

Ato u konfirmuan në Samitin e Thesalonskit në vitin 2003, ku po ashtu u organizuan takime të rregullta të nivelit të lartë.
 

< Paraprake		Pasuese >