Radio Televizioni i Kosovës i kërkon falje publike gazetares Liridona Lluka-Gashi dhe të gjithë gazetarëve që janë ndier të fyer në incidentin e ndodhur dje në aeroportin e Prishtinës.

“Dëshirojmë t’u sqarojmë të gjithëve se veprimet e gazetarit Milaim Zeka janë veprime të tij personale dhe në asnjë mënyrë nuk janë qëndrim i Radio Televizionit të Kosovës”, thuhet në një komunikatë për shtyp të nënshkruar nga drejtori I Përgjithshëm Sylejman Shaqiri.

“Menaxhmenti i RTK-së do të shqyrtojë rastin në hollësi e me kujdes dhe do t’i ndërmarrë të gjitha masat në përputhje me Rregulloret e RTK-së, me standardet profesionale dhe parimet etike të gazetarisë në programet e Radio Televizionit të Kosovës, duke zbatuar dispozitat që rregullojnë marrëdhëniet e RTK-së me të angazhuarit me kontratë mbi vepër”, thuhet në fund të reagimit.

Ndërkaq edhe Unioni i Gazetarëve të Kosovës ka shprehur shqetësimin me sjelljet sipas tyre, jo etike të disa gazetarëve në Aeroportin Ndërkombëtar të Prishtinës.

Në reagimin e UGK-së thuhet se sjelljet e tilla janë të papranueshme dhe jo dobi dhënëse për gazetarët duke shtuar se gazetarët duhet t’i respektojnë parimet dhe etikën e gazetarisë. Incidenti ndodhi të premten pasdite, pas konferencës për shtyp të mbajtur nga kryetari i Kuvendit Jakup Krasniqi pas kthimit të tij nga Kuvajti.

Autori i një emisioni në RTK Milaim Zeka, i cili u pa të dilte nga aeroplani me të cilin kishte udhëtuar Krasniqi, fyu kolegët e tij nga mediat e tjera pasi i ishin drejtuar Krasniqit me pyetje të cilat nuk kishin të bënin me udhëtimin e kryetarit të Parlamentit të Kosovës.





 

< Paraprake		Pasuese >