Përfaqësuesja e serbëve të Kosovës, Rada Trajkovic, duke u thirrur në burime ndërkombëtare, ka deklaruar se Beogradi zyrtar po lobon në mënyrë të përshpejtuar në qarqet ndërkombëtare për ndarjen e Kosovës.

Ky lobim, siç ka thënë Trajkovic në një intervistë për revistën “Press”, kryesisht është fokusuar drejt SHBA-ve.

Realiteti i jetës së serbëve në Kosovë, sipas Trajkovic-it, tregon se Beogradi zyrtar është duke ndjekur dy politika, një për veriun e Kosovës dhe një tjetër për jugun e saj.

Trajkovic ka thënë se lobimi po zhvillohet drejt kabinetit të presidentit amerikan.

“Sipas njohurive të mia, këtë projekt Serbia është duke u përpjekur që ta jetësojë nëpërmjet kabinetit të presidentit amerikan, Barack Obama”, ka thënë Trajkovic.

E pyetur se kush nga Beogradi është duke lobuar për ndarjen e Kosovës, Trajkovic nuk ka dëshiruar të përgjigjet, mirëpo ajo ka thënë se Serbia kurrë nuk ka hequr dorë nga një politikë e tillë.

Madje, ajo ka kujtuar një rast kur disa vite më parë ka qenë pë vizitë në SHBA, dhe në kabinetin e nënpresidentit të atëhershëm amerikan, Dick Cheney, kishte dëgjuar se Kostunica ,(i cili ishte pritur një ditë më herët nga Cheney) i kishte ofruar atij njohjen e territorit poshtë Ibrit, për territorin mbi Ibër.
 

< Paraprake		Pasuese >