Komisioni për Persona të Pagjetur i Kosovës gjatë një takimi të mbajtur të mërkurën me delegacionin për persona të pagjetur nga Serbia ka marrë premtime se brenda dy ose tri javësh do të fillohet me gërmimin e varrezës masive në Rashkë të Serbisë, ku dyshohet të gjenden trupat e pajetë të 250 shqiptarëve të vrarë gjatë luftës në Kosovë.

Prenk Gjetaj, kryetar i Komisionit për Persona të Pagjetur në një konferencë të mbajtur të mërkurën pas takimit me delegacionin serb, ka thënë se është duke u punuar që saktësisht të dihet vendit se ku ndodhen këto trupa në mënyrë që mos të gabohet si herët e kaluara.

Pajazit Nushi, anëtar i Komisionit për Persona të Pagjetur, ka thënë se orientimi i palës kosovare ka qenë që të mbahet një takim për organizim sa më të shpejtë për nxjerrjen e mbetjeve mortore dhe identifikimin e tyre.

Arsim Gërxhaliu, ekspert i mjekësisë ligjore, njëherësh anëtar i komisionit, ka thënë se e rëndësishme është që pala serbe ka pranuar që pala kosovare të jenë prezent në hapjen e kësaj varreze dhe gjithashtu edhe ekipi i EULEX-it.

Ndërsa lidhur me transferimin e këtyre kufomave menjëherë për në Kosovë, Gërxhaliu ka thënë se kjo mbetet për fazën e dytë, duke shtuar se kërkesa e palës kosovare është që ato të sjellën menjëherë në Prishtinë.

Edhe 11 vjet pas përfundimit të luftës në Kosovë nuk dihet ende për fatin e mbi 1800 personave të zhdukur.
 

< Paraprake		Pasuese >