Mënyra e asgjësimi të materialeve zgjedhore të zgjedhjeve të vitit 2009 dhe përsëritjes së tyre në disa faza, mbetet ende e paqartë për Komisionin Qendror Zgjedhor, sikur që mbetet e paqartë edhe procedura e angazhimit të kompanisë që do ta bëjë asgjësimin e materialit.

Komisioni Qendror i Zgjedhjeve në mbledhjen e së mërkurës ka diskutuar për këtë çështje, e cila ka nxjerrë në pahë kundërshtimet mes anëtarëve të KQZ-së, lidhur me raportin që ka prezantuar kryeshefi i Sekretariatit të KQZ-së, Xhemajl Peçani.

Derisa në mbledhje kishte pasur diskutim rreth mënyrës me të cilën ka punuar kryeshefi Peçani, duke zhvilluar biseda private me kompanitë, kryesuesi i mbledhjes, Blerim Burjani ka thënë pas mbledhjes se përzgjedhja e kompanisë që do ta bëjë asgjësimin e materialit do të bëhet me tender.

Forma e bisedimit me kompanitë dhe sjellja e ofertave bashkëngjitur me raport nga ana e kryeshefit të Sekretariatit të KQZ-së është kritikuar nga Florian Dushi, i cili ka thënë se metoda të tilla i përkasin shekullit të kaluar.
Ai ka thënë se duhet të jepen sqarime pasi që është parë si më e volitshme një kompani që nuk ka dhënë fare çmim në ofertën e saj.

Edhe anëtarët tjerë të KQZ-së kanë kritikuar këtë formë të punës, duke kërkuar që të veprohet sipas Ligjit të prokurimit publik dhe që të ndiqet procedura e tenderimit dhe e transparencës së plotë.

Përballja me këto kritika ka shtyrë kryeshefin e SKQZ-së të sqarojë se kompania që nuk ka përmendur çmimin në ofertë, ka ofruar shërbim falas, ndërkohë që ka theksuar se gjithsesi do të ndiqen procedurat e tenderimit.
 

< Paraprake		Pasuese >