Deputeti i Partisë Liberale serbe Dragan Dimiq, u paraqit në gjykatë, pasi akuzohet për mashtrim, falsifikim dokumenti dhe një sërë veprash penale.

Por, në gjykatë ai nuk shkoi me dëshirë, u desh që policia nga Mitrovica t’a sjellë në Gjykatën Komunale në Vushtrri.

Çështja e akuzave për vjedhje votash, arriti në gjyq.

Mirëpo, paditësit dhe i padituri nuk janë nga Gjakova, Prizreni apo Gjilani, e as nga partitë më të mëdha që akuzuan njëra tjetrën, për manipulime me vullnetin e votuesve në këto qytete.

Madje, procesi që filloi të martën në gjykatën komunale të Vushtrrisë, ka të bëjë me zgjedhjet e përgjithshme të vitit 2007. Në bankën e zezë, u paraqit Dragan Dimiq, deputet serb i Kuvendit të Kosovës.

Përfaqësuesi i Partisë së Pavarur Liberale, akuzohet për mashtrim, falsifikim dhe vjedhje të votave. Kallzimi penal ndaj tij ishte përgatitur nga policia, ndërsa padisë i është bashkangjitur edhe Lubisha Simiq, kryetari i Lidhjes së socialdemokratëve të pavarur, në radhët e së cilës kishte konkurruar Dimiq, në zgjedhje.

“Mendoj se deri te posti i tij ka ardhur me vjedhje të votave. Ai është sjellë nëpër vendvotim gjatë tërë ditës kur po votohej, dhe është prezantuar si kryesues i qendrës së votimit në emër të djalit të tij”, tha kryetari i Lidhjes së Social-demokratëve të Pavarur, Ljubisha Zhiviq.

Por, Dimiq i mohoi akuzat.

Ai, pranoi se kutinë me fletëvotime, pas mbylljes së ditës së zgjedhjeve e ka dërguar në depon e kuvendit komunal zgjedhor. Këtë hap ai tha se e bëri, pasi që djali i tij që duhej të kryente këtë procedurë ishte i shantazhuar me largim pune nga shkolla fillore në fshatin Gracë”, theksoi deputeti i kuvendit të Kosovës Dragan Dimiq.
Fjala e fundit e gjyqit për këtë rast, do të jepet të martën e ardhshme.

< Paraprake		Pasuese >