Është shumë vështirë që një shtet i cili nuk është i pranuar në Kombet e Bashkuara të ketë kodin e vet telefonik. Ky është vlerësimi që japin ekspertë kosovarë të ekonomisë.

Shpend Ahmeti nga Instituti GAP, ka thënë se i gjithë sistemi telefonik fiks dhe një pjesë e asaj të lëvizshme shkon përmes Serbisë të cilat sipas tij jo vetëm që e rrisin koston e telekomunikacionit, por edhe e dobësojnë cilësinë e telekomunikacionit që kemi.

Për ushtruesin e detyrës së kryetarit të Odës Ekonomike të Kosovës, Safet Gërgjaliu, ndarja e një kodi për Kosovën është një sfidë e madhe, dhe për këtë edhe MTPT-ja edhe PTK-ja duhet t’a vënë në prioritetin e tyre.

Ndërkohë ende nuk dihet një datë e qartë se kur Kosova do të ketë një kod të vetin telefonik. Në mungesë të kodit shtetëror, Kosova shfrytëzon tri kode të shteteve të huaja. Për telefoninë fikse përdor atë të Serbisë 381, ndërsa për telefonitë mobile përdoret kodi i Monakos 377 dhe ai slloven 386.
 

< Paraprake		Pasuese >