Kuvendi i Kosovës ka miratuar 67 amandante duke i dhënë mbështetje Ligjit për shërbimin civil.

Kryetari i Komisionit për administratë publike, Esat Brajshori ka thënë se janë harmonizuar këto amendamente, duke shtuar se komisionet përkatëse i kanë shqyrtuar këto amandamente dhe kanë arritur që të harmonizojnë qëndrimet.

“Ky projektligj ka rëndësi të jashtëzakonshme, për shkak se përfundimisht do të rregullohet statusi i nëpunësve civilë, qoftë në nivel qendror, qoftë në atë lokal”, ka thënë Brajshori.

Në këtë mënyrë, Projektligji që kishte shumë kundërshtime në seancën e 29 prillit, u miratuar me 80 vota për 1 kundër dhe 1 abstenim.

Ligjvënësit tani po miratojnë amandamentet e projektligjit për pagat e nëpunësve civilë, ndërkohë, më herët kryeparlamentari Jakup Krasniqi ka shfrytëzuar momentin kur në sallë ishin më shumë se 80 deputetë, për të miratuar propozim-amandamentet e Qeverisë së Kosovës për ndryshimin dhe plotësimin e Marrëveshjes me Fondin Monetar Ndërkombëtar, pikë kjo që kërkon pjesëmarrjen e dy të tretave të Kuvendit.

< Paraprake		Pasuese >