Ish-minatorët e “Trepçës” të ardhur në këmbë nga Mitrovica, u kthyen sërish në vendin e tyre, duke i marrë me vete edhe kërkesat që i sollën në Qeveri, paraditen e së mërkurës. 

Mirëpo, në takimet që mbajtën me zv/kryeministrin Ramë Manaj dhe ministrin e Financave Ahmet Shala dhe ai i Punës dhe Mirëqënies Sociale Nenad Rashiq, morën premtimin se së shpejti do të zgjidhen kërkesat dhe statusi i tyre.

Përfaqësuesi i ish-punëtorëve të “Trepçës” Ramadan Ademi tha se u është premtuar që Ligji pensional, ai invalidor, Ligji i punës dhe Ligji për shëndetësi do të merret në shqyrtim për miratim.

Disa prej protestuesve ishin kundër kthimit në Mitrovicë.

Ata kërkonin që të qëndrojnë para ndërtesës së qeverisë deri në realizimin e kërkesave të tyre.

Protestuesit pjesën më të madhe të rrugës së tyre e bënë në këmbë nga veriu i vendit. Kjo u bë në shenjë pakënaqësie mbi kushtet në të cilat jetojnë dhe plotësimin e nevojave të tyre për jetesë. Ata vendosën që kthimin ta bënin ndryshe, me autobusë.
 

< Paraprake		Pasuese >