Policia e EULEX-it, bastisi sot në Prziren, shtëpinë e ish-eprorit të UÇK-së, Xhemshit Krasniqi, i cili nga prokuroria speciale e Kosovës konsiderohet si i dyshuar për kryerjen e krimeve kundër popullatës civile gjatë vitit 1999.

Sipas familjarëve të Xhemshit Krasniqit, i cili është edhe anëtar i Kuvendit Komunal të Prizrenit, policia e misionit të BE-së ka shprehur interesim për të dhe me këtë rast kanë konfiskuar disa pajisje dhe uniforma të tij, mirëpo, nuk kanë arritur ta gjejnë edhe të dyshuarin.

Ndaj aksionit të Policisë së EULEX-it ka reaguar Organizata e Veteranëve të Luftës e UÇK-së në Prizren, e cila veprimin e policëve të misionit evropian në Kosovë e ka quajtur akt të shëmtuar.

“Të gjithë luftëtarëve të UÇK-së iu bë me dije nga ky mision se lufta jonë e pastër çlirimtare konsiderohet krim dhe nuk ka asnjë vlerë”, thuhet në reagimin e OVL të UÇK-së, e cila i kërkon EULEX-it që të ndërpriten veprimet e tilla ndaj veteranëve të luftës së UÇK-së.

Zëdhënësi i Policisë së Kosovës Baki Kelani, ka konfirmuar për Kosovapress se PK-ja nuk ka marrë pjesë në aksionin e policisë së EULEX-it dhe se nuk ishte në dijeni në lidhje me aksionin.  

< Paraprake		Pasuese >