Në rajonin e Vushtrrisë është bërë zhvarrimi i mbetjeve mortore të tetë personave të pagjetur. Aksioni është ndërmarrë nga Zyra për Persona të Zhdukur dhe Mjekësi Ligjore e cila bashkë-drejtohet nga EULEX-i dhe Ministria e Drejtësisë së Kosovës.

Në një komunikatë për media, EULEX thekson se ky është rezultat i hetimeve të thella arkivore të kryera në vitin 2009, që ka përfshirë shqyrtimin e shumë dosjeve dhe shfrytëzimin e burimeve të ndryshme.

Që nga fillimi i punës së Misionit EULEX në Kosovë, më 9 dhjetor 2008, është bërë zhvarrimi i mbetjeve mortore të 122 personave. Në komunikatë thuhet gjithashtu se Zyra për Persona të Zhdukur dhe Mjekësi Ligjore është e specializuar për një varg të gjerë të fushave të mjekësisë ligjore. Në Kosovë edhe 11 vjet pas luftës nuk dihet për fatin e mbi 1800 personave të zhdukur.

< Paraprake		Pasuese >