"Nuk dihet kush i vrau, por dihet se kush urdhëroi varrosjen e qindra shqiptarëve në varrezën masive në Rudnicë të Rashkës. Këta përgjegjës, tani gjenden në Hagë".

Këtë e pohoi kryeprokurori serb për krime lufte, Vladimir Vukqeviq.

Ai, aludoi në pesëshen e eprorëve politik, ushtarak e policor serb që u gjetën fajtor për dëbimin e shqiptarëve, nëpërmjet një fushate të gjerë të terrorit dhe vrasjeve masive.

Me këto akuza, ish-zvkryeministri jugosllav, Nikolla Shainoviq, gjenerali ushtarak, Nebojsha Pavkoviq, dhe gjenerali policor Sreten Lukiq, u dënuan në shkurt të vitit të kaluar, me nga 22 vjet burg, ndërsa dy gjeneralët tjerë ushtarak, Dragoljub Ojdaniq e Vladimir LAzareviq, morën nga 15 vjet. I pafajshëm ndërkaq, ishte shpallur ish-presidenti serb, Milan Milutinoviq.

Kryeprokurori Vukçeviq, i tha të mërkurën gazetës serbe Danas, se vrasësit mund të zbulohen atëherë kur të jetë bërë eks-humimi, identifikimi i trupave si dhe analizimi i deklaratave të dëshmitarëve nga Kosova. Paraprakisht, ai tha se duhet vendimi i gjykatësit hetues për hapjen e varrezës së mundshme.
 

< Paraprake		Pasuese >