Drejtues të degës së Aleancës për Ardhmërinë e Kosovës në Gjilan, kanë thënë të mërkurën se vetëm mbajtja sa më shpejt e zgjedhjeve nacionale mund të ndalë zhvillimet negative që janë duke u bërë me qeverisjen e tanishme në Kosovë.

Kreu i AAK-së në Gjilan, Ahmet Isufi përmendi që raportet e ndryshme si vendore e ndërkombëtare flasin për një shkallë të lartë të korrupsionit nëpër institucione, ndërsa vlerësoi se Kosova sot ka një qeverisje e cila ka rënduar jetën e qytetarëve.

“Ne duhet të kemi institucione stabile të bazuara në Kushtetutën e Kosovës dhe në legjislaturën e cila është më e avancuar dhe që garanton një stabilitet, një siguri më të madhe, një mirëqenie sociale, ekonomike dhe po ashtu një zhvillim më të hovshëm të Kosovës”, ka thënë Isufi.

Për më tepër, kreu i AAK-së në Gjilan konstatoi se sikurse në nivelin qendror ashtu edhe në atë lokal të Gjilanit ekziston nivel i lartë i korrupsionit. Sipas Isufit edhe emërimi i fundit i drejtorëve në Gjilan ka vërtetuar pohimet e tija të mëhershme se ndikimi ka qenë nga lartë dhe se emërimi është bërë pa pajtueshmërinë e kreut komunal.

Ndër të tjera, Isufi theksoi se dega e AAK-së në Gjilan, e cila përgjatë këtyre viteve ka shënuar vazhdimisht ngritje, sikurse edhe në nivelin qendror, i ka bërë të gjitha përgatitjet për kremtimin e 10-vjetorit të themelimit të saj.
 

< Paraprake		Pasuese >