Shtetet e Bashkuara të Amerikës do të mbështesin çfarëdo dialogu teknik në mes të Kosovës dhe Serbisë që është në interes të këtyre dy vendeve, por jo edhe për çështjet që kanë të bëjnë me statusin e këtij vendi, pasi që kjo gjë ka marr fund. 

Kështu u shpreh ndihmës-sekretari amerikan i shtetit, Filip Gordon, pas takimit që ka pasur me ministrin e jashtëm të Kosovës Skender Hyseni. Gordon tha se nëse përfaqësuesit e Kosovës dhe Serbisë përgatiten të ulen së bashku dhe fillojnë të ballafaqohen me këto çështje teknike, kjo është diçka e mirë dhe ne do t’i përkrahim.

Ndërkaq ministri Hyseni ka deklaruar se zgjidhja më e mirë do të ishte që Serbia ta njoh pavarësinë e Kosovës. Gordon në paraditen e së mërkurës ka zhvilluar edhe një takim të përbashkët me presidentin Fatmir Sejdiu dhe kryeministrin Hashim Thaqi. Pas këtyre takimeve nuk ka pasur prononcime për media.
 

< Paraprake		Pasuese >