Lideri i Aleancës për Ardhmërinë e Kosovës, Ramush Haradinaj, kërkon që sa më parë të ndërpritet qeverisja Thaçi, të cilën e konsideron të zhytur në korrupsion.
Këtë qëndrim të tij, kreu i AAK-së e ka përsëritur në një intervistë të përditshmes “Zëri”.

Ai mirëpret vazhdimin e hetimeve edhe për ministra të tjerë aktual, sikur që kërkon hetime edhe ndaj qeverive të kaluara.
Sipas tij, AAK-ja do të ndihmonte këtë ekzekutiv në një qeveri teknike për ta çuar vendin deri në zgjedhje për të mos lejuar trauma e dëmtim të mëtejmë të vendit.

Haradinaj pret një vendim të mirë për Kosovën nga Gjykata Ndërkombëtare e Drejtësisë, por jo aq të mirë sa e meritojnë kosovarët.
Ndërsa, sa i përket bisedimeve me Serbinë, lideri i AAK-së thotë se Kosova duhet të hyjë në bisedime por jo për çështje të statusit, rendit kushtetues apo territorit të vendit.

< Paraprake		Pasuese >