Policia e Suboticës ka arrestuar sot një grup ndërkombëtar trafikantësh, në mesin e të cilëve disa kosovarë, të cilët dyshohen se kanë trafikuar njerëz, kryesisht shqiptarë nga Kosova.

gazeta "Express" njofton se sipas Ministrisë së Punëve të Brendshme të Serbisë janë arrestuar nëntë persona.

Ata akuzohen se kanë transportuar ilegalisht njerëz nga Kosova në Serbi, nëpër autostradë deri në Suboticë, e më pas, në rrugë ujore nëpër lumin Tisa në rajonin e vendkalimit kufitar Horgosh e Kelebia në Hungari.

Në tetor të vitit të kaluar, në lumin Tisa humbën jetën 16 kosovarë, derisa po e kalonin ilegalisht kufirin.

MPB-ja serbe ka dhënë emrat e pesë të arrestuarve: Sadat Uka (35) nga Dumnica e Ulët e Podujevës, Sabehudin Arifi (24) nga Konçuli i Bujanovcit, József Katona (44) nga Subotica, Goran Bojanic (28) nga Sombori dhe Milano Vukeliç (36).

Ministri serb, Ivica Daçiq, ka thënë se ky rast tregon për nevojën e domosdoshme të bashkëpunimit ndërkombëtar policor, transmetojnë mediat serbe. Ai ka përmendur se policia serbe për këtë grup ka pasur informata edhe nga Austria.  

< Paraprake		Pasuese >