"Qeveria dhe gjithë qytetarët e saj janë mirënjohës për kontributin e Bashkimit Evropian për ndihmën që kanë dhënë në të kaluarën dhe atë që janë duke dhënë aktualisht në ndërtimin e Kosovës".

Këtë deklaratë, kryeministri i Kosovës e bëri ditën kur në Prishtinë po qëndronte komisionari i BE-së për zgjerim Shtefan Fyle.

Ku i fundit erdhi në Kosovë për të shënuar Ditën e Evropës, 48 orë më herët. E shumë organizime u bënë për 9 Majin. Thaçi, nuk u pa askund në ditën e Evropës.

Mbase janë ngatërruar ditët e datat.

Tek një ditë më vonë, të hënë, kabineti i kryeministrit dërgon një mesazh përmes së cilit, në emër të Thacit, u urohet qytetarëve dita e Evropës, ndërkohë që fesa për ta ka mbaruar. Dhe sikur të mos i mjaftojë me vetëm një herë, zyra për shtyp e kryeministrit, e ka dërguar edhe dy herë këtë mesazh urimi.

Zëdhënësi i Qeverisë, Memli Krasniqi, thotë se e tëra ka qenë gabim i zyrës për Informim në Qeveri. Por, Ismet Cakqi, i cili e ka lëshuar për shtyp këtë komunikatë, thotë se mesazhi i urimit ka ardhur nga kabineti, të hënën me 10 maj.

Atëherë Memli Krasniqi, i cili është edhe këshilltar i Thaçit, mendon se kjo vonesë është një detaj i vogël për të cilin nuk preferon të flasë. Sido që te jetë, kryeministri i Kosovës, Hashim Thaci, që ka 13 këshilltarë politikë, në urimin e tij, thotë se vlerat evropiane janë pikësynim i përditshëm drejt përmbushjes së të gjitha parakushteve për t’u integruar sa më parë në mesin e shteteve dhe kombeve te Bashkimit Evropian.

Kosova si shtet i pavarur sipas Thacit, mbetet e përkushtuar për raporte të mira fqinjësore e rajonale me synim që sa më shpejt të jetë pjesë e familjes euroatlantike, e Bashkimit Evropian dhe NATO-s.
 

< Paraprake		Pasuese >