Për shqiptarët e Kosovës, universiteti serb në veri të Mitrovicës është institucion paralel. Ai financohet nga Serbia dhe nuk ka kurrfarë lidhje me pushtetin e Prishtinës. Komisari për Zgjerim i Bashkimit Evropian, Shtefan Fuele, u takua, të premten, me kreun e këtij universiteti dhe mbajti një ligjëratë për studentët.

Përfaqësuesit e BE-së në Kosovë nuk e konsiderojnë këtë si një vizitë të institucioneve paralele. “Nuk mendoj se organizuam vizitë tek strukturat paralele".

"Ne organizuam vizita në Univeristetin e Prishtinës, të Prizrenit dhe të Mitrovicës”, ka thënë shefi i Zyrës së Komisionit Evropian në Kosovë, Renzo Davidi.

Ai sqaron se universitetin serb në veri evropianët e kanë ndihmuar edhe më parë. “Universiteti në Mitrovicë është institucion të cilin e kemi ndihmuar në të kaluarën në marrëveshje me Qeverinë e Kosovës”, tha Davidi.

Presidenti Fatmir Sejdiu, që u kthye nga një vizitë në Gjermani, nuk deshi të komentojë në lidhje me këtë duke thënë se nuk ka informacione. E opozita edhe për këtë vizitë të zyrtarit të lartë evropian fajëson qeverinë.

Sidoqoftë, rektori i universitetit serb, Zdravko Vitosheviq, pret që Bashkimi Evropian t’i ndihmojë në përmirësimin e kushteve dhe t’i kthejë në objektet, të cilët ai i quan të vetat, në Prishtinë.
 

< Paraprake		Pasuese >