As Presidenti e as Kryeministri nuk duhet të heshtin, sikur “Rasti Limaj” nuk është zhvillim shqetësues për qeverinë e koalicionit mes tyre.

Analistët e shohin si gabim mungesën e deklaratave të tyre, edhe pesë ditë pas operacionit të EULEX-it në zyrat dhe pronat e Ministrit të Transportit.

Mufail Limani thotë se kjo çështje duhet të shihet në dy aspekte. Së pari, sipas tij, kur dihet se kjo punë i takon gjyqësorit, një mosdeklarim i tillë është korrekt.

Mirëpo, meqë bëhet fjalë për një ministër, megjithatë këta liderë duhet të paraqiten me komente të tyre.

Bardh Hamzaj vlerëson se rasti me ministrin Limaj, është një ngjarje e pazakontë, prandaj duhet të sqarohet opinioni i gjerë.

Çështja Limaj, ka nxitur edhe reagimet e subjekteve politike. Mirëpo, partia e Drejtësisë të dielën kërkoi që ky rast të mos politizohet, por t’i lihet në dorë drejtësisë.

Deri më tani është deklaruar vetë ministri Fatmir Limaj, i cili tha se, EULEX-i kërkoi diçka që i duhej në hetimet e veta. Kurse Misioni Evropian në Kosovë përmes një deklarate për media tregoi se, ky operacion ka për bazë dyshimet në dhënien e tenderëve për rrugët, gjatë periudhës 2007 – 2009.


 

< Paraprake		Pasuese >