EULEX-i hap letrat, dhe sqaron arsyet përse bastisi ministrinë e Fatmir Limajt. Misioni Evropian për forcimin e sundimit të ligjit në Kosovë, po heton tenderët për ndërtimin e rrugëve gjatë periudhës 2007-2009.

Sqaron po ashtu, se bastisjet dhe hetimet, janë bërë me lejen e Gjykatës së Qarkut në Prishtinë, nga një gjyqtar i procedurës paraprake. Gjithçka thuhet se po bëhet nën mbikëqyrjen e zyrës së Prokurorisë Speciale dhe policisë së EULEX-it.

Nuk përmenden emra të zyrtarëve të Ministrisë së Transportit dhe Post-Telekomit, të cilët po hetohen për këta tenderë. Misioni Evropian, sqaroi përmes një kumtese se po mbledh material dëshmues.
Shefi i EULEX-it, Yves de Kermabon, takoi të enjten ministrin e Integrimeve Evropiane Besim Beqajn. Mediat u ftuan, por zyrtarët refuzuan të dalin para tyre.

Heshtja e së mërkurës u vërejt edhe të enjten. Ministri i Ekonomisë dhe Financave, Ahmet Shala refuzoi të komentojë për bastisjet në dikasterin e kolegut të tij. EULEX-i sqaron në komunikatë se në këtë fazë, bastisjet janë thjesht të karakterit hetues, ndërsa dëshmitë e mbledhura po analizohen me kujdes.

< Paraprake		Pasuese >