Ministri i punëve të jashtme të Italisë Franko Fratini ka thënë se Italia e inkurajon një dialog mes Kosovës dhe Serbisë.

Ai ka shtuar se shpejt pritet në nisin këto bisedime, duke thënë se Konferenca e Sarajevës, në të cilën do të marrin pjesë në mënyrë të barabartë edhe Kosova edhe Serbia, do të jetë fillim i këtyre bisedimeve.

Këtë deklaratë ai e dha gjatë takimit me presidentin e Kosovës Fatmir Sejdu. Ndërkohë Fratini ka përsëritur qëndrimin se Kosova meriton që të ketë progres në rrugën e saj drejt Evropës, duke filluar nga lëvizja e lirë e qytetarëve, nga heqja e vizave dhe negociatat, të cilat ai shpreson se do të fillojnë shpejt për një marrëveshje për tregtinë e lirë mes Kosovës dhe Bashkimit Evropian.

Lidhur me konferencën e cila pritet të mbahet në Sarajevë, sipas tij Kosova do të japë kontributin e rëndësishëm dhe pozitiv dhe prania do të jetë e bazuar në dinjitet të barabartë të të gjithë pjesëmarrësve në konferencë. Të njëjtat qëndrime ai ka mbajtur edhe me kryeministrin e Kosovës Hashim Thaçi, me të cilin diplomati italian diskutoi mbi krijimin e raporteve të ngushta fqinjësore mes vendeve të rajonit.

< Paraprake		Pasuese >