Edhe një antenë e operatorit mobil IPKO në veri të Kosovës është jashtë funksionit. Rreth mesnatës në fshatin Bistricë të komunës së Leposaviqit me mjete shpërthyese është dëmtuar antena e këtij operatori.

Shpërthimin e ka konfirmuar edhe policia rajonale në Mitrovicë. Dyshohet se është përdorur mjeti i njëjtë shpërthyes sikur i një nate më parë kur është dëmtuar një antenë e IPKO-së në Rudare të Zveçanit.

Këto sulme ndaj antenave të IPKO vijnë pas aksionit të ART-së për shkyçjen e operatorëve ilegal serb në Kosovë.

Sulmi ndaj antenës së njërit prej operatorëve të licencuar të telefonisë mobile, që ndodhi mbrëmë në fshatin Rudar i Vogël, të Zveçanit, është dënuar fuqishëm nga Qeveria e Kosovës.

Këto veprime kriminale nga kushdo që janë bërë, cenojnë rendin dhe ligjin, thuhet në një komunikatë të lëshuar nga zyra për informim e Qeverisë, e cila fton organet kompetente që të ndërmarrin hapat e nevojshëm që akterët e sulmit të nxirren para drejtësisë.
 
Presidenti i Serbisë Boris Tadiq ka thënë se shkyqja e operatorëve serbë të telefonisë mobile në Kosovë paraqet një qëllim të rrezikshëm të autoriteteve në Prishtinë.

Ndërkohë Serbia do të fillojë aksion ndërkombëtar në mënyrë që serbët e Kosovës të mund të shfrytëzojnë shërbimet e operatorëve serb të telefonisë mobile. Këtë e ka bërë të ditur presidenti i Serbisë, Boris Tadiq të dielën në Valevë. Presidenti serb ka thënë se është tmerruar me reagimin e EULEX-it i cili me qetësin më të madhe po shikon shkeljen e të drejtave të njeriut. Sipas tij, Telekom Serbija është në gjendje që për 7 ditë të riparojë pajisjet e shkatërruara.

Nga ana tjetër, Këshilli Nacional serb në veriun e Kosovës ka dthënë se kjo cështje duhet të diskutohet në KS të OKB-së ndërsa shoqatat e gazetarëve serbë në Beograd e Kosovë kanë dënuar paaftësimin e pajisjeve të radiotelevizionit Herc në Shterpcë.

< Paraprake		Pasuese >