Qytetarët e Istogut kanë dal sot në zgjedhjet e jashtëzakonshme për kryetarin e komunës së tyre. Zyrtarët e shtabeve zgjedhore të partive politike njoftuan se të gjitha qendrat, me përjashtim të asaj në Osojan, janë hapur me kohë dhe se nuk ka pasur parregullsi.

Por, ndryshe ka raportuar Koalicioni i Organizatave Joqeveritare “Demokracia në Veprim”, të cilët kanë thënë se kanë identifikuar parregullsi, si mungesa e listës së kandidatëve, mungesa e udhëzimeve për votime, si dhe fotografime të votave nga votuesit.

Raportohet se deri rreth orës dhjetë të mëngjesit, ftesës i janë përgjigjur 5 për qind e votuesve. Konferencën e tyre e kanë mbajtur edhe përfaqësuesit e KQZ-së, sipas të cilëve janë katër ekipe mobile, të cilat do të jenë aktive në këtë komunë.

Një ekip në burgun e Dubravës, dhe Shtëpinë e të Moshuarve dhe dy ekipe do të jenë të angazhuar për votimin e personave me nevoja të veçanta. Ndryshe, zgjedhjet e jashtëzakonshme në Istog mbahen pas vdekjes së kryetarit të kësaj komune, Fadil Feratit. Të drejtë vote kanë 39 mijë e 307 qytetarë. 

< Paraprake		Pasuese >