Një delegacion i Republikës së Kosovës, ka marrë pjesë në meshën e përshpirtshme të mbajtur në Kishën Katolike të Shkupit për Presidentin e Polonisë, Lech Kaczynski, bashkëshorten e tij Maria dhe zyrtarët e tjerë të lartë të shtetit polak, të cilët humbën jetën të shtunën në aksidentin tragjik.

Në delegacion ishin të pranishëm pwrfaqwsues tw presidencës, kryeministrisë dhe Ministrisë së Punëve të Jashtme të Kosovës, si dhe i ngarkuari me Punë i Republikës së Kosovës në Republikën e Maqedonisë, Skënder Durmishi.

Delegacioni nënshkroi në librin e zisë e cila ishte hapur në ambasadën e Republikës së Polonisë në Shkup. 

Në meshën e përshpirtshme për Presidentin Kaczynski, përveç ambasadorit të Polonisë në Shkup, morën pjesë edhe gjithë krerët më lartë shtetërorë të Maqedonisë, Presidenti George Ivanov, kryeministri Nikolla Gruevski, kryetari i Kuvendit e zyrtarë të tjerë të lartë, si dhe ambasadorë dhe përfaqësues nga e gjithë bota të akredituar në Shkup.

Ambasadori i Polonisë falënderoi pjesëmarrësit, ndërsa me theks të veçantë falënderoi për solidaritetin e treguar nga Republika e Kosovës dhe sidomos pjesëmarrjen e delegacionit të Kosovës në meshën e përshpirtshme në Kishën Katolike të Shkupit.

< Paraprake		Pasuese >