Me të marrë lajmin për vdekjen tragjike të Presidentit të Polonisë, Shkëlqesisë së Tij Lech Kaczynski, Presidenti i Republikës së Kosovës, Fatmir Sejdiu, ka shprehur ngushëllimet e tij më të sinqerta për popullin dhe institucionet e Polonisë. 

Në mesazhin e Presidentit Sejdiu, ndër të tjera, thuhet: “Në emër të popullit dhe të institucioneve të Republikës së Kosovës shpreh dhembjen e thellë për shuarjen tragjike të Presidentit të Polonisë, Lech Kaczynski, të bashkëshortes së tij, si dhe të bashkëpunëtorëve që e shoqëronin atë”.

Po ashtu, Presidenti Sejdiu thekson se, në këto çaste të rënda zie për popullin polak, Republika e Kosovës qëndron pranë këtij vendi mik dhe shpreh solidaritetin e plotë me të. Gjithashtu edhe Presidenti i Republikës Bamir Topi ka shprehur dhimbjen dhe tronditjen e tij të thellë për humbjen e jetës së presidentit të Republikës së Polonisë, Lech Kaczynski, bashkëshortes së tij dhe delegacionit që e shoqëronte, si pasojë e një aksident ajror në Smolensk.

“Me hidhërim të thellë dhe tronditje mësova lajmin e aksidentit tragjik ku humbi jetën presidenti Lech Kaczynski, bashkëshortja e tij dhe delegacioni zyrtar që e shoqëronte. Në emër të shtetit shqiptar dhe në emrin tim personal, ju shpreh ngushëllimet më të thella dhe më të sinqerta", thuhet në mesazhin e presidentit Topi.

Kreu shqiptar ne mesazhin e tij, shprehet se i qëndron shume pranë të gjithë popullit polak në këtë moment të vështirë.
 

< Paraprake		Pasuese >