Dy shqiptarë janë sulmuar në pjesën veriore të Mitrovicës nga një grup serbësh, ka bërë të ditur Këshilli për Mbrojtjen e të Drejtave dhe Lirive të Njeriut. Të sulmuarit janë 26 vjecari Zenun Mustafa dhe 28 vjecari Blerim Mustafa.

Ngjarja ka ndodhur gjatë ditës së djeshme në lagjen “Kodra e Minatorëve” ku sipas KMDLNJ-së, lëndime të rënda ka marrë Zenun Mustafa, kurse Blerim Mustafa ka arritur t’u ikte sulmuesve. “Blerimi falë mundësisë për të ikur ka arritur të lajmërojë patrullën e policisë.

Ata që kujdestaronin gjatë natës në urën kryesore mbi lumin Ibër, ishin një shqiptar dhe një serb dhe nuk j’u kanë ofruar ndihmë”, thuhet në një komunikatë të KMDLNJ-së.

Zëdhënësi i Policisë së Kosovës për rajonin e Mitrovicës, Besim Hoti ka mohuar deklaratën, duke thënë se policia u ka ofruar ndihmë të lënduarve, ku njërin nga ta e kanë dërguar në qendrën mjekësore për trajtim.

Përderisa ai e ka konfirmuar ngjarjen shtoi se asnjë pjesëtar i policisë nuk ka qenë i pranishëm në rastin kur dy qytetarët u sulmuan me gurë nga të rinjtë serbë. Në komunikatë thuhet se ndihma e policisë nuk ka ardhur për shkak se sipas tyre nuk u lejohet të intervenojnë në pjesët e “okupuara” të qytetit.

< Paraprake		Pasuese >