Pozitat dhe kompetencat që mbajnë kanë bërë dy zyrtarët më të lartë të Bashkimit Europian në Kosovë, Pieter Feith dhe Yves de Kermabon të mos kenë raporte të mira me njëri-tjeterin. Ky është konstatimi që jep gazeta “Express” e cila bazohet në burime të saj.

Pieter Feith si përfaqësues i BE-së është i ngarkuar të koordinojë praninë europiane në Kosovë, që nënkupton edhe Zyrën Ndërlidhëse të BE-së edhe EULEX-in. Ky status, sipas “Express” i siguron holandezit epërsi ndaj francezit Kermabon, i cili ka gradën e gjeneralit dhe ka shërbyer edhe si Komandant i KFOR-it.

Raportet mes tyre, shton e përditshmja kosovare, janë përfolur edhe më parë me arsyetimet se si një gjeneral francez e ka të vështirë të marrë urdhra apo të jetë nën komandën e një diplomati holandez.

Dy përfaqësuesit e BE-së në Kosovë, sipas gazetës, shtyhen për primat, rrallë herë shihen në aktivitete të përbashkëta dhe kanë mospajtime serioze për çështje të rëndësishme. Zyrtarisht, Feith dhe Kermabon mohojnë të kenë mospajtime, shkruan "Express".




 

< Paraprake		Pasuese >