Mbledhja e qeverisë së Kosovës u mbajt të martën për të fundit herë me ministrat aktualë. Kjo mbledhje, u vlerësua edhe si takim lamtumirës pasi reformat në qeveri, përfshijnë 6 ministra të kabinetit të kryeministrit të Kosovës Hashim Thaçi nga të dy partitë në koalicion, PDK e LDK.

Kjo ndodhi pasi kryeministri Hashim Thaçi ka deklaruar se qeveria kërkon kapacitete të reja. Ai gjithashtu ka lavdëruar ministrat për punën e tyre.

Ndërkohë lista me emrat e rinjë nuk është zyrtarizuar të martën, pasi ministrat e LDK-së, sipas burimeve të Klan Kosovës, nuk janë pajtuar të largohen pa u dhënë arsye.

Ka mbetur që të mërkurën, kryesia e LDK-së, të mblidhet dhe të japë vlerësimet për punën e ministrave të saj që largohen. Ndryshe lista e bërë publike nga Klan kosova që të dielën, mbetet pothuajse e njëjta.

Informacionet e fundit, janë që Alush Gashi, Nekibe Kelmendi, Zenun Pajaziti, Idriz Vehabi, Fehmi Mujota dhe Valton Beqiri do të largohen. Ndërkohë që Edita Tahiri, Bajram Rexhepi, Lutfi Haziri, Bujar Bukoshi do jenë fytyrat e reja në Qeveri.

Ndryshimi i vetëm është në Ministrinë e Drejtësisë, ku Nekibe Kelmendin do e zëvendësojë profesori i Kriminalistikës në Universitetin e Prishtinës Haki Demolli. Dardan Gashi dhe Zenun Pajaziti, do jenë zëvendës ministra për integrime. Ajo që nuk dihet ende është se kush do të jetë Ministri i Integrimeve.
 

< Paraprake		Pasuese >