Papunësia dhe varfëria janë problemet kryesore të qytetarëve të Kosovës kurse KEK-u vazhdon që të prijë listën e institucioneve ku korrupsioni vlerësohet të ketë shkallën më të lartë, pasuar me gjykatat, Agjencinë Kosovare të Privatizimit, administratën qendrore dhe doganat.

Ky është vlerësimi i dhënë nga raporti i fundit i UNDP-së në Kosovë. Niveli i vlerësimit për institucionet qeverisëse të Kosovës ka shënuar rënie në krahasim me periudhën e raportimit në shtator 2009.

Kurse, kënaqësia me punën e KFOR-it dhe të Policisë së Kosovës janë të vetmet që kanë shënuar ndryshime pozitive. Gjithashtu edhe vlerësimi për punën e EULEX-it ka rënë gjatë periudhën tetor-dhjetor 2009.

Ndërsa, kënaqësia me punën e PSSP-së, ka arritur nivelin më të ulët të të gjitha kohërave, i cili ka shkuar në 8 për qind. Të dhënat e raportit bazohen në anketën e bërë në fund të janarit dhe fillim të shkurtit të sivjetëm. Anketa është bazuar në intervista sy më sy me mbi 1200 të anketuar.

< Paraprake		Pasuese >