Policia Rajonale e Pejës ka arrestuar një 25 vjeçar me iniciale A.D. nga fshati Lubovë i komunës së Burimit, nën dyshimin se ka kryer grabitje nën kërcënimin e armëve. Dyshohet se me të ka qenë edhe një person tjetër I cili ka arritur të ikë.

Zyrtari për shtyp në policinë rajonale të Pejës Xhevat Ibraj ka thënë të premten se personi i lartpërmendur është arrestuar në orët e vona të natës së mbrëmshme, në rrugën Novosellë- Burim, në vendin e quajtur “Dydesh”, afër fshatit Orroberdë të Burimit.

“Policia ka arritur të sekuestrojë një revole të tipit “Ekol Tuna”, modeli 6.30 cal. 22 mm dhe një karikator me dy fishekë. Gjatë hetimeve, nga njësitet përkatëse hetimore rajonale janë duke u mbledhur prova dhe dëshmi lidhur me veprën penale të tentim grabitjes, si dhe veprave tjera të mundshme”, ka thënë Ibraj.

I dyshuari është ndaluar në ndalim policor me urdhër të prokurorit. Hetimet janë në vazhdimësi nga Njësiti i Hetimeve Rajonale të Drejtorisë Rajonale të Policisë Pejë.

< Paraprake		Pasuese >