Një femër nga Fshati Koretinë i Kamenicës, është rrëmbyer prej dy ditësh nga tre persona që dyshohet të jenë nga rajoni i Gjilanit. Sipas policisë, e tërë ngjarja ndodhi kur tre persona me një automjet të tipit BMW me ngjyrë të kuqe, kanë marrë vajzën në fshatin e saj dhe kanë filluar të ikin me veturë.

Por, babai i viktimës ka lajmëruar policinë dhe Njësitet patrulluese menjëherë janë vënë në kërkim të veturës e cila është ndaluar nga policia në fshatin Dobërqan të Gjilanit, ku janë takuar dy të dyshuarit, të cilët janë arrestuar.

Pas intervistimit është kuptuar se i dyshuari i tretë së bashku me viktimën kanë dal nga vetura në fshatin Dobërqan dhe për momentin nuk dihet lokacioni i tyre.

Lidhur me rastin është njoftuar prokurori dhe i njëjti ka sugjeruar që të dyshuarit I. N. 28 vjeçar dhe M. R. 21 vjeçar të ndalen në qendrën e mbajtjes për 48 orë.

Policia është në kërkim të të dyshuarit të tretë i cili po ashtu është i njohur për policinë. Gjilani është rajoni me numrin më të madh të rrëmbimeve kohëve të fundit, ndërsa policia vazhdimisht arrin të zbulojë vendin e rrëmbyesve dhe të lirojë viktimat.

 

< Paraprake		Pasuese >