Presidenti Fatmir Sejdiu para ambasadorëve të shteteve anëtare të Këshillit të Atlantikut Verior në Bruksel, ka bërë një rezyme të të arriturave të Kosovës.

Ai ka përmendur strategjinë për veriun i cili sipas tij ka për qëllim integrimin e popullatës së pjesës veriore të Kosovës në institucionet e shtetit.

Presidenti Sejdiu tha se janë bërë hapa konkretë për funksionalizimin e kësaj strategjie, për të cilën institucionet e Republikës së Kosovës kanë përkrahjen e institucioneve ndërkombëtare.

Presidenti Sejdiu ka folur edhe për bashkëpunimin e institucioneve të vendit me institucionet ndërkombëtare, KFOR-in, EULEX-n dhe ICO-në. Sejdiu theksoi se institucionet e Republikës së Kosovës kanë një bashkëpunim shumë të mirë me KFOR-in.

Ai e çmoi shumë të rëndësishëm rolin e KFOR-it në mbrojtjen e integritetit territorial të Kosovës, ndërsa theksoi edhe një herë mbështetjen e fuqishme që KFOR-i ka dhënë dhe po jep në ngritjen e Forcës së Sigurisë së Kosovës në përputhje me standardet e NATO-s.

Duke folur për punën e EULEX-it, ai tha se ekziston nevoja për veprime konkrete në vendosjen e sundimit të ligjit në të gjithë Republikën e Kosovës, ndërsa në raportet me ICO-në ai ritheksoi vazhdimin e bashkëpunimit në zbatimin e Planit të Presidentit Ahtisari. Duke përmendur njohjet nga 65 vende demokratike ai u shpreh i bindur se numri i tyre do të rritet pas dhënies së mendimit nga Gjykata Ndërkombëtare e Drejtësisë.

Ndër të tjera ai ka përmendur ngritjen e institucioneve të shtetit dhe ka shprehur rëndësinë e Kosovës si faktor stabiliteti në rajon.




 

< Paraprake		Pasuese >