Qeveria e Kosovës nuk foli në mbledhjen e saj për raportin vjetor të Departamentit Amerikan të Shtetit, pavarësisht gjetjeve të tij. Por zëdhënësi i saj Memli Krasniqi, pas mbledhjes tha se raporti në fjalë duhet të merret seriozisht.

“Ne mendojmë që raportet që vijnë nga institucionet e rëndësisë së veçantë si Departamenti i Shtetit duhet të merret shumë seriozisht dhe ato janë marrë vazhdimësi seriozisht. Kemi parasysh këto gjetje dhe këto rekomandime për t’i përfshirë në qasjen tonë në luftën kundër korrupsionit dhe dukurive tjera negative të cilat ende ekzistojnë si të trashëguara nga vitet e kaluara”, ka thënë zëdhënësi Krasniqi .

Derisa opozita e ka vlerësuar raportin si objektiv, nuk kanë nguruar t’i adresojnë kritika qeverisë aktuale.
Sekretari i përgjithshëm i AKR-së Avdi Smajlaj ka thënë se raporti nuk sjell asgjë të re përveç shkallës së lartë të korrupsionit, sepse korrupsioni sipas tij pothuajse është mbjellur, është zhvilluar dhe është lulëzuar nga të gjitha qeveritë e pasluftës.

“Kjo është çështja më shqetësuese sa i përket nivelit të korrupsionit në Kosovë” ka thënë Smajlaj. E anëtari i kryesisë së AAK-së, Besnik Tahiri, tha se raporti i Departamentit të Shtetit, tregon se nuk është vetëm AAK-ja kritikuese e punës së qeverisë aktuale. Raporti i sivjetëmm i Departamentit Amerikan të Shtetit thekson se korrupsioni, ndërhyrja e qeverisë në forcat e rendit e sigurisë dhe në gjyqësor, mbeten ndër problemet kryesore në Kosovë. Raporti nënvizon se ka rënie të dhunës ndëretnike, por problem mbeten strukturat paralele të Serbisë.


 

< Paraprake		Pasuese >