Presidenti Fatmir Sejdiu dhe kryeministri Hashim Thaçi në deklarime të ndara kanë uruar të gjitha gratë shqiptare, në ditën ndërkombëtare të gruas, 8 marsi.

Presidenti Sejdiu ka thënë në një konferencë të mbajtur për këtë ditë në Universitetin Amerikan, se kjo ditë është një mundësi për reflektim për gjendjen e grave në Kosovë.

Ndërkohë, zonja e parë e vendit Nezafete Sejdiu, tha se në Kosovë janë bërë disa ndryshime përsa i përket përfaqësimit të grave në institucionet publike, ndonëse përmendi sfidat me të cilat sipas saj duhet ende të përballet femra shqiptare.

Ajo inkurajoi vajzat e reja të vijojnë studimet e larta dhe krijojnë mundësi punësimi dhe trajnime profesionale. Ndërsa kryeministri Thaçi tha se gruaja kosovare është e përfaqësuar në shoqërinë dhe në institucionet e Kosovës.

Ai ka premtuar se Qeveria e tij do të vazhdojë të ndërmarrë hapa konkretë që ky përfaqësim të jetë edhe më meritor duke shtuar se edhe në kohët më të vështira gratë e Kosovës ishin vënë fuqishëm në shërbim të plotë të mbrojtjes së vlerave humane të qytetarëve tanë.

< Paraprake		Pasuese >