Kuvendi i Kosovës, po debaton sot për zbatimin e kushtetutës në tërë territorin e Kosovës, debat ky që ka ardhur pas një kërkese të Lidhjes Demokratike të Dardanisë.
Nexhat Daci, kryetar i LDD-së, tha para deputetëve se Kushtetuta nuk është duke u zbatuar në Kosovë, e sidomos në veriun e vendit.
Por më shqetësuese, sipas Dacit, është fakti se Kushtetuta po shkelet edhe nga institucionet e Kosovës.

Edhe partitë tjera opozitare, akuzuan qeverinë se nuk është në gjendje ta zbatoj kushtetutën.
Strategjia e Qeverisë për veriun, sipas AAK-së, nuk është diçka më shumë sesa projekti i Thacit për fidanët. Për më tepër deputetët opozitar janë të habitur se si dokumenti I strategjisë nuk ka arritur në duar të deputetëve.
Kryeministri Hashim Thaçi, tha se debate si ky i kanë munguar shumë Kuvendit. Por ajo që nuk ka munguar, sipas tij, është rezultati i punës së qeverisë.
LDD-ja si inicuese e këtij debati, kërkoi që në fund të nxirret një rezolutë që do të ishte obligative për Qeverinë e Kosovës. Por deputetët e pozitës nuk u pajtuan duke sugjeruar vetëm nxjerrjen e një dokumenti nga ana e Kuvendit të Kosovës.

< Paraprake		Pasuese >