Shefi i EULEX-it, Iv De Kermabon dhe nikoqirët e tij serb, ministri për Kosovë, Goran Bogdanoviq dhe sekretari shtetëror për drejtësi, Slobodan Homen, u ndanë të kënaqur nga takimi i tyre i sotëm në Beograd.

Sipas një kumtese për media nga EULEX-i, palët u pajtuan se ka nevojë urgjente për përmirësimin e gjendjes së sundimit të ligjit në veri të Kosovës, dhe kjo sipas tyre arrihet me zgjidhje pragmatike.

Ndërkohë, Bogdanoviq u tha madieve pas takimit, se mori garanci nga Kermabon se misioni i Bashkimit Evropian nuk qëndron pas planit të përgatitur nga Piter Feith dhe Qeveria e Kosovës për integrimin e veriut, dhe se nuk do të mbështes dhunën dhe zgjidhjen e imponuar për veriun e Kosovës.

Për më tepër, Bogdanoviq tha se Beogradi dhe EULEX-i do të formojnë grupe punuese, të cilat do të merren me çështje teknike në fushën e doganave, sundimit të ligjit dhe policisë, ndërsa takimet e këtyre grupeve do të intensifikohen gjatë javëve të ardhshme.

Mirëpo, në një kumtesë për medie, EULEX bëri të ditur se në takim nuk është bërë asnjë marrëveshje për ngritjen e grupeve punuese në këto fusha, pasi takimi u përqendrua pothuajse tërësisht në normalizimin e punës së gjykatës në Mitrovicë.

< Paraprake		Pasuese >