Ambasadori i Britanisë së Madhe në Beograd Stephen Wordsworth, ka thënë për të përditshmen “Veçernje novosti” se pavarësia e Kosovës nuk mund të kthehet prapa.

Ai gjithashtu ka theksuar se për Serbinë nuk është kusht që të njohë Kosovën dhe të hyjë në NATO, për t’u bërë antare e BE-së.

Ai ka thënë se vendimi i Gjykatës Ndërkombëtare të Drejtësisë mbi ligjshmërinë e shpalljes së pavarësisë së Kosovës nuk do të ndikojë tek vendimi I vendeve që tashmë e kanë pranuar realitetin e ti në Kosovë.

Diplomati britanik ka thënë për gazetën serbe se askush nuk kërkon nga Serbia të njohë pavarësinë e Kosovës, duke shtuar se Evropa nuk dëshiron të ketë “vrima të zeza” në rajon, prandaj sipas tij të 27 vendet anëtare të BE-së pajtohen që ky territor, një ditë duhet të jetë brenda BE-së.

z. Wordsworth ka thënë se bisedimet mes Beogradit e Prishtinës janë të nevojshme, por jo për statusin dhe njohjen e pavarësisë, por për zgjidhjen e problemeve të shumta sociale që kanë banorët.

Ambasadori britanik ka bërë një rezyme të arritjeve të njohjeve por edhe antarësimeve të Kosovës në organizata ndërkombëtare dhe sipas tij është ireale që e gjithë kjo të kthehet prapa.

Duke dolur për vendimin e Gj.N.D-së Wordsworth ka thënë se ai do të japë vetëm një mendim këshillëdhënës dhe jo vendim të detyrueshëm juridik.

< Paraprake		Pasuese >