Ministria e Punëve të Brëndshme të Kosovës ka urdhëruar Policinë e Kosovës të ndërpresë qëndrimin e përkohshëm të imamit të xhamisë së Skënderajt Kastriot Duka nga Elbasani, i njohur si Xhemajl Duka, në territorin e Republikës së Kosovës.

Sipas një komunikate të kësaj ministrie, thuhet z.Duka i është shqiptuar kjo masë pas vërtetimit të gjendjes faktike për shkelje të vazhdueshme të legjislacionit në fuqi si dhe cenimit në disa raste të rendit publik dhe Kushtetues të Republikës së Kosovës.

Në njoftim thuhet gjithashtu se lementet inkriminuese të vërtetuara edhe me paraqitjet publike të zotit Duka flasin për një ndërrim të arsyes dhe qëllimit për të cilin edhe i është dhënë lejeqëndrimi në territorin e Republikës së Kosovës.

Zoti Duka së fundmi me vendim të plotfuqishëm të Gjykatës kompetente ka qenë i shpallur fajtor për shkelje të legjislacionit në drejtim të qëndrimit të paligjshëm në Republikën e Kosovës, thuhet në njoftim. Më tej theksohet se ekzistojnë arsye të besueshme dhe të vërtetuara edhe nga vetë zoti Duka në paraqitjet e tij publike se qëllimi primar për të cilin ka kërkuar të qëndrojë në Republikën e Kosovë, është ndryshuar dhe ka orientim krejtësisht tjetër.

“Leja e qëndrimit i është lëshuar për zhvillimin e aktiviteteve humanitare e jo të aktiviteteve tjera të cilat zoti Duka ka ushtruar në territorin e Republikës së Kosovës. Nisur nga këto fakte dhe në bazë të këtij vendimi, Policia e Kosovës sot me datë 03 Mars 2010 ka arrestuar dhe deportuar në shtetin amë z.Kastriot Duka. Të njejtit i ndalohet hyrja në territorin e Republikës së Kosovës bazuar në dispozitat ligjore në fuqi, “Ligji për të huaj”, thuhet ne njoftim.

Vendimi është marrë në mbështetje të ligjeve në fuqi të Kushtetutës së Republikës së Kosovës, thuhet më tej në njoftimin e Ministrisë së Punëve të Brëndshme të Kosovës.

< Paraprake		Pasuese >