Kosova ka pranuar të marrë pjesë në konferencën rajonale të Ballkanit Perëndimor që do të mbahet në Slloveni me emrin UNMIK/Kosovo.

Kështu shkruan e përditshmja beogradase “Danas” e cila thotë se përfaqësuesit zyrtarë në konferencë, do të kenë përpara ulëses së tyre vetëm emrat dhe jo vendet prej nga vijnë.

Sipas gazetës, organizatorët do të ftojnë zyrtarët e institucioneve të Prishtinës dhe UNMIK-ut si përfaqësues nga Kosova duke shtuar se zyrtarët e UNMIK-ut do të flasin përpara përfaqësuesve të Kosovës.

E përditshmja citon burime nga Brukseli të cilët konfirmojnë se Presidenti i Kosovës Fatmir Sejdiu dhe kryeministri Hashim Thaçi janë dakorduar me këto kushte.

Qeveria e Beogradit nuk i ka komentuar këto informacione, pasi kabineti është në pritje të marrjes së ftesës formale për në konferencë, e cila do të mbahet më 20 Mars.

< Paraprake		Pasuese >