Kosova nuk do të ftohet si Republikë në samitin që do të mbahet në Kranjë, afër Lubjanës. Kështu shkruan gazeta “Koha Ditore”, në numrin e sotshëm, e cila mbështetet në burimet e veta diplomatike në Bruksel.

Në këtë samit të organizuar nga Sllovenia dhe Kroacia, që do të mbahet më 20 mars, Kosova pritet të marrë pjesë si “Kosovo/UNMIK”, ose me prapashtesën “UNSC 1244”.

Sipas gazetës kjo do të bëhet për të siguruar pjesëmarrjen e Serbisë në këtë samit, por edhe të presidencës spanjolle, dhe të krerëve të BE-së.

Në këtë samit pritet që të bëhen përpjekje për të përshpejtuar rrugën e integrimit të vendëve të Ballkanit në Bashkimin Evropian.

Kryeministri slloven, Borut Pahor, dhe kolegia e tij kroate, Jadranka Kosor, mendojnë që të ftojnë shefat e qeverive të vendëve të Ballkanit, por edhe krerë të institucioneve të BE-së, shkruan gazeta.

Sipas kësaj formule pritet që edhe Spanja të ftojë Kosovën në konferencën e cila do të zhvillohet në Sarajavë, gjatë muajit Maj apo Qershor, porse ftesat ende nuk janë dërguar.

< Paraprake		Pasuese >