Politikanët serbë të veriut të Kosovës kundërshtojnë shtimin e pranisë së Policisë së Kosovës në atë pjesë, duke e quajtur si tentim, që me forcë, të zbatohet strategjia për veriun, por edhe dëshirë për t’u konfrontuar me serbët.

“Serbët kanë të drejtë që sigurinë e tyre t’ua besojnë atyre që u besojnë dhe kjo nuk e nënkupton Policinë e Kosovës, e cila do të ishte pjesë e sistemit të vetëm të policisë dhe natyrisht nuk i nënkupton shqiptarët”, ka thënë politikani serb Oliver Ivanovic.

Sipas tij, serbët deri tani nuk kanë pranuar asgjë që u është imponuar me dhunë e presion dhe që ka rrezikuar interesat vitale të tyre duke shtuar se serbët në veri nuk do të frikohen nga, siç i quajti ai, kërcënimet e autoriteteve të Prishtinës dhe të disa subjekteve të bashkësisë ndërkombëtare, në mesin e të cilave edhe pakti i NATO-s.

Ndërsa, Marko Jaksic, politikan serb nga veriu i Kosovës, thotë se serbët e kësaj pjese i kanë organet e qeverisjes lokale dhe se ato do të marrin një vendim lidhur me këtë çështje.

< Paraprake		Pasuese >