Kuvendi i Kosovës është mbledhur sot në senacë plenare. I pranishëm ishte kryeministri i Kosovës, Hashim Thaçi i cili ka premtuar se gjatë viteve në vijim do të hapen edhe katër universitete publike.

Këto komente ai i bëri i shtyrë nga pyetjet e deputetes së AAK-së, Xhylnaze Syla dhe asaj të LDD-së, Dritë Maliqi, të cilat kanë kërkuar datën e hapjes së universiteteve, ndërkohë që kanë kritikuar kryeministrit se po jep premtime për hapje të universiteteve vetëm në vendet prej nga vjen ai.

Reagime pati nga deputetja Maliqi e cila tha se Gjilani është lënë anash në këtë aspekt dhe se të rinjve të këtij qyteti po u mungojnë premtimet e kryeministrit Thaçi, siç është autostrada, hekurudha dhe aeroporti.

Në agjendën e parlamentarëve kosovar janë shqyrtimet e disa projektligjeve siç janë ai për kodin për drejtësi për të mitur, ndryshimi dhe plotësimi i ligjit për pyjet, plani i veprimit të kuvendit për integrimet evropiane për këtë vit dhe propozimi i qeverisë për lejimin e pagesës për furnizim për vaksina. Ndërkohë nga rendi i ditës është hequr Projektligji për organizmat e modifikuar gjenetikisht, i cili i është kthyer qeverisë për përpunim.

< Paraprake		Pasuese >