Britania e Madhe nuk e ka ndërmend të ndalet vetëm me njohjen e pavarësisë së Kosovës. Londra i ka vënë vetes mision edhe synimin që fuqizimin e shtetit të ri ta vendos në mesin e prioriteteve të Bashkimit Evropian.

Burime brenda ministrisë së jashtme britanike, i kanë thënë portalit EuObserver, se Mbretëria e Bashkuar, synon që njëkohësisht të qartësojë edhe rrugën evropiane të Serbisë.

Këto dy qëllime gjenden në planet afatgjate, të Londrës, ndërsa si plan afatshkurtër, dhe urgjent është synimi për gjetjen e një zgjidhje të qëndrueshme për veriun e Kosovës, të dominuar nga serbët.

Kur bëhet fjalë për këtë pjesë, një burim nga Bashkimi Evropian i ka thënë këtij portali, se Britania e Madhe, synon të gjejë një zgjidhje të mesme ndërmjet planit të Ahtisaarit, sipas të cilit zonat e dominuara nga serbët kanë një nivel të lartë të vetëqeverisjes, si dhe ndarjes së veriut, e cila do të komplikonte integrimin e të dyjave vendeve në BE.

Londra, sipas këtij burimi, nuk po insiston që Beogradi ta njoh Kosovën, por që të tregohet pragmatik karshi shtetit të ri, pasi nga kjo qasje do të duhet të varet edhe integrimi i Serbisë në Bashkimin Evropian.

< Paraprake		Pasuese >