Presidenti i Republikës së Kosovës Fatmir Sejdiu dekretoi gjyqtarët e Gjykatës Supreme, prokurorët e Prokurorisë së Shtetit dhe prokurorët e Prokurorisë Speciale, të cilët dhanë betimin para tij.

Kryetar i Gjykatës është emëruar Fejzullah Hasani, ndërsa gjyqtarë janë Nesrin Lushta, Valdete Daka, Emine Kaqiku, Gyltene Sulejmani, Emine Mustafa, Shukri Sulejmani, Enver Peci.

Kryeprokuror në Prokurorinë e Shtetit u emërua Ismet Kabashi e ndërsa Zyhra Ademi, Rexhep Kabashi e Jusuf Mejzini u emëruan prokurorë.

Në Prokurorinë Speciale të Kosovës zëvendëskryeprokurore speciale u emërua Sevdije Morina, e prokurorë janë Reshat Millaku, Nazmi Mustafi, Suad Kuraja, Merita Bina, Rrahim Podvorica, Faik Halili, Basri Morina, Besim Kelmendi dhe Ali Rexha.


Presidenti Sejdiu e vlerësoi ditën e sotme si një ditë të përmbylljes së një cikli që ka të bëjë me sistemin gjyqësor dhe Prokurorinë e Kosovës si dhe një ditë e përmbylljes së një pune zinxhirore që është bërë mbi bazë të Kushtetutës së Republikës së Kosovës.

“Besoj se këta njerëz që kanë marrë përgjegjësi do të ushtrojnë detyrën e tyre duke u mbështetur në Kushtetutën dhe ligjet e Republikës së Kosovës”, theksoi Presidenti Sejdiu.

Në ceremoninë e dekretimit të gjyqtarëve dhe prokurorëve ishin të pranishëm edhe kryeministri Hashim Thaçi, përfaqësues të institucioneve ndërkombëtare, ambasadorë të akredituar në vendin tonë, si dhe mysafirë të tjerë.

< Paraprake		Pasuese >