Këshilli Kundër Procesit Gjyqësor ndaj Albin Kurtit, i cili u krijua sot nga dhjetra organizata joqeveritare kërkon nëpërmjet një deklarate që ky proces të mbyllet, i cili sipas tyre dëmton demokracinë dhe të drejtat e njeriut në Kosovë.

Ata kërkojnë të fillohet një proces i pavarur hetimi qoftë edhe ndërkombëtar për ngjarjet e 10 shkurtit 2007 në mënyrë që të zbulohet përgjegjësia penale për vrasjen e Arben Xheladinit dhe të Mon Balajt, si dhe për plagosjen dhe lëndimin e 80-të personave të tjerë, institucionet e Kosovës, Kryetari, Qeveria dhe posaçërisht Kuvendi i Republikës së Kosovës, si dhe Avokati i Popullit të bëjnë presionin e duhur ndaj misioneve ndërkombëtare në Kosovë për mbylljen e këtij procesi gjyqësor si dhe të fillojnë procedurat për hetimin e vrasjeve.

Në deklaratë gjithashtu thuhet që Këshilli i Evropës, Parlamenti Evropian, OSBE-ja, Komisariati i Lartë i OKB-së për të Drejta të Njeriut si dhe organizatat ndërkombëtare jo-qeveritare të merren me mbrojtjen e të drejtave të njeriut dhe të ndikojnë që ky proces të mbyllet, njëkohësisht të bëjnë presionin e duhur që të fillojnë hetimet për vrasjet e protestuesve më 10 shkurt 2007.

Ky këshill procesin gjyqësor ndaj Albin Kurtit e quan të kundra-ligjshëm me të drejtat ndërkombëtare.

< Paraprake		Pasuese >