Komandanti i forcave paqeruajtëse në Kosovë, gjenerali gjerman Markus Bentler ka thënë në një intervistë për Zërin e Amerikës se KFOR-i nuk është pjesë ë strategjisë për integrimin e veriut të Kosovës. Ai tha se në atë pjesë të vendit ka ende rreziqe të kufizuara për gjendjen e sigurisë që sipas tij në përgjithësi është e qetë.

Gjenerali Bentler I pyetur rreth strategjisë për integrimin e veriut nga qeveria e Kosovës dhe zyra civile ndërkombëtare, ai tha se KFOR-i nuk luan rol në zbatimin e saj.
“Ne nuk kemi qenë pjesë e hartimit të saj. Siç e dinë të gjithë qytetarët e Kosovës ne jemi të paanshëm. Ne nuk mund të jemi pjesë e një strategjie të tillë. Por, roli ynë është shumë i rëndësishëm e ai është ruajtja e mjedisit të sigurt dhe lirisë së lëvizjes në Kosovë. Ne po ndjekim zhvillimet politike me kujdes, po vëzhgojmë çfarë po ndodhe dhe natyrisht në një mënyrë të caktuar ne mbështesim çdo përparim politik që mund të çojë në përmirësimin e kushteve të jetës për qytetarët”, ka thënë Bentler për VOA.

I pyetur nëse ka rrezik për trazira në pjesën veriore të Kosovës, gjenerali Markus Bentler u përgjigj se “Rreziku është gjithmonë aty. Kemi parë vitin e kaluar në pjesën veriore të Mitrovicës, në Kroin e Vitakut disa përplasje dhe dhunë gjatë ndërtimeve në atë zonë, që janë menaxhuar mirë nga EULEX-i dhe policia e Kosovës. Nuk e vlerësojmë si rrezik të shkallës së gjerë, ai mund të jetë i kufizuar, por ne ende jemi mjaft të përqendruar në atë zonë dhe nuk mund ta shpërfillim rrezikun ekzistues.”
Ai I ka bërë thirrje politikanëve dhe posaçërisht popullatës që të përmbahen nga dhuna dhe të mbështeten në shërbimet tona dhe në procesin politik.

< Paraprake		Pasuese >