Një vit pas themelimit, fillon të armatoset Forca e Sigurisë së Kosovës. Ministria e FSK-së, njofton të ketë bërë porosinë e armëve të para. Bëhet fjalë për blerjen e 375 armëve të gjata, të cilat pritet të arrijnë gjatë këtij muaji në Kosovë.

Konfirmimi u dha edhe nga komandanti i FSK-së, gjenerallejtënant Sylejman Selimi. “Është bërë prokurimi dhe nënshkrimi i kontratave nga MFSK dhe për armët e gjata G36 janë të paguara 375 copë.

Të gjitha procedurat janë kryer dhe pritet vetëm licenca e bartjes së transportit të tyre. Një pjesë e municionit të ardhur është 5.56 i cili është kontraktuar me Zvicrën, pajisjet e komunikimit Harres janë të SHBA-ve, si dhe pistoletat Glok 17 të cilat kanë ardhur para vitit të ri”.

Në saje të konceptit të konstituimit të mëtejmë të Forcës së Sigurisë së Kosovës, grupi i përbashkët punues FSK-NATO, pritet të përcaktojë tutje se çfarë lloji të armatimit do të ketë FSK-ja, por sipas ligjit nuk mund te ketë armë tjera përpos ato të krahut, dhe armë të lehta. Forca e Sigurisë së Kosovës, parashihet të ketë 2500 pjesëtarë aktiv, që nuk quhen ushtarë.

Do të ketë edhe 800 forca rezervë. Deri më tani janë përzgjedhur afro 1800, të cilët janë kryesisht ish-pjesëtar të TMK-së së shpërndarë, me mbi 1400 sosh.

< Paraprake		Pasuese >