Grupi Ndërkombëtar Drejtues shprehu sot në Vjenë mbështetjen e plotë për përforcimin e përpjekjeve për veriun e Kosovës, bazuar në rekomandimet e ICO-së, të cilat do të zhvillohen më tutje në konsultim me palët përkatëse të interesit.

Nëpërmjet një komunikate për media, ky trup ndërkombëtar u bëri thirrje të gjitha palëve përfshirë edhe Serbinë, që të luajnë rol konstruktiv në këtë proces.

Grupi Ndërkombëtar Drejtues beson se Kosova duhet të bëjë përparim urgjent në luftimin e korrupsionit, krimit të organizuar në përmirësimin e kapacitetit administrativ dhe instalimin e Sundimit të Ligjit, përfshirë edhe në veriun e Kosovës.

Më tutje në komunikatë thuhet se përparimi i madh në çështjet e qeverisjes do të jetë jetik për të siguruar se Raporti i ardhshëm i Progresit i Komisionit Evropian do të dërgojë sinjal pozitiv për avancimet e Kosovës drejt perspektivës së saj Evropiane, të cilën e pret populli i Kosovës.

< Paraprake		Pasuese >