Përfaqësuesi Civil Ndërkombëtar Pieter Feith, ka emëruar 14 anëtarë në Ekipin Përgatitor Komunal për komunën e re të Mitrovicës Veriore. Ky ekip do të ketë mandat teknik për të përgatitur të gjitha resurset, pasuritë dhe strukturat administrative që nevojiten për krijimin dhe funksionimin e ardhshëm të komunës së re të Mitrovicës Veriore. Sipas një komunikate të Zyrës Civile Ndërkombëtare bëhet e ditur se të emëruarve do t’u bashkohet edhe nga një përfaqësues i Ministrisë së Administrimit të Pushtetit Lokal, një përfaqësues nga “komuna amë” dhe një përfaqësues nga Zyra Civile Ndërkombëtare. Pieter Feith ka thënë se krijimi i komunës së re të Mitrovicës Veriore në kuadër të një sistemi të vetëm të qeverisjes lokale anembanë Kosovës do ta përafrojë qeverinë komunale me komunitetin, do të avancojë zhvillimin ekonomik, dhe do të ndihmojë në gjetjen e zgjidhjeve ndaj problemeve konkrete dhe qasjes në resurse më të mëdha. Ai e ka quajtur një mundësi për një fillim të ri për komunën e re, synimi final i së cilës sipas tij është që Mitrovica Veriore të bëhet një komunë me një të ardhme pozitive, të qëndrueshme, të sigurt dhe prosperuese për njerëzit që jetojnë atje.

< Paraprake		Pasuese >